Մշտական հոգնածություն, կարծես ուժերը սպառվում են արդեն օրվա կեսին։ Գլուխը կարծես մառախուղի մեջ լինի, քաշը հավաքվում է ինքնին, իսկ դուք անընդհատ ուզում եք փաթաթվել տաք ծածկոցի մեջ, նույնիսկ եթե տանը ջերմ է։ Եթե ձեզ ճանաչեցիք այս նկարագրության մեջ, ապա պատճառը կարող է լինել ոչ միայն եղանակը կամ գերհոգնածությունը։ Երբեմն այսպես է ազդանշան տալիս վահանաձև գեղձը՝ մի փոքրիկ, բայց չափազանց կարևոր օրգան, որը կարգավորում է ամբողջ օրգանիզմի աշխատանքը։
Եթե այն սկսում է ավելի դանդաղ գործել, քան սովորաբար (ինչը բժշկության մեջ կոչվում է հիպոթիրեոզ), դանդաղում է ամբողջ նյութափոխանակությունը, իսկ մենք մեզ անզոր, հոգնած և ապատիկ ենք զգում։ Լավ նորությունն այն է, որ մենք կարող ենք օգնել մեր վահանաձև գեղձին, այդ թվում՝ սննդակարգի միջոցով։ Բավական է սննդակարգում ներառել այն մթերքները, որոնք բարենպաստորեն են ազդում դրա աշխատանքի վրա՝ կարծես նրան «նոր շունչ» տալով։
Ստուգե՛ք ինքներդ ձեզ. հնարավոր է՝ արժե՞ ուշադրություն դարձնել վահանաձև գեղձին։
Պատասխանե՛ք «այո» կամ «ոչ» հետևյալ հարցերին.
Հաճա՞խ եք հոգնածություն և քնկոտություն զգում, նույնիսկ եթե 8 ժամ քնել եք։
Քա՞շ եք հավաքում՝ չնայած սովորական սննդակարգին։
Մաշկն ավելի չո՞ր է դարձել, մազերը կոտրվո՞ւմ և ավելի շատ են թափվում, քան սովորաբես։
Մրսո՞ւմ եք նույնիսկ այն ժամանակ, երբ մյուսներին տաք է։
Առաջացե՞լ է ցրվածություն, մոռացկոտություն, դժվա՞ր է կենտրոնանալ։
Մինի-թեստի արդյունքները.
0–1 «այո». Հավանաբար, դուք պարզապես գերհոգնած եք։ Սակայն առողջության մասին հոգ տանելն ավելորդ չի լինի։
2–3 «այո». Արդեն կա պատճառ՝ մտածելու սննդակարգի և ինքնազգացողության մասին։
4–5 «այո». Բարձր է հավանականությունը, որ վահանաձև գեղձին իսկապես աջակցություն է հարկավոր։ Մի՛ հետաձգեք էնդոկրինոլոգի մոտ այցը։
Լավագույն 5 մթերքները, որոնք օգնում են վահանաձև գեղձին ավելի լավ աշխատել
Ծովային կաղամբ (լամինարիա)
Իրական չեմպիոն յոդի պարունակությամբ՝ T3 և T4 հորմոնների սինթեզի համար առանցքային տարր։ Առանց դրա վահանաձև գեղձը պարզապես չի կարող նորմալ գործել։
Ինչու է սա կարևոր. Եթե յոդը բավարար չէ, հորմոնների արտադրությունը նվազում է, և դրա հետ մեկտեղ՝ էներգիայի մակարդակը։
Ինչպես ուտել. Շաբաթական 2-3 անգամ 100-150 գրամ ծովային կաղամբը բավարար է։ Կարելի է օգտագործել որպես աղցան (ցանկալի է ընտրել առանց ավելորդ շաքարի և քացախի տարբերակներ) կամ ավելացնել չորացրած լամինարիա ապուրներին և բանջարեղենային ուտեստներին։
Բրազիլական ընկույզ
Պարունակում է ռեկորդային քանակությամբ սելեն՝ միկրոտարր, որը կրիտիկական նշանակություն ունի վահանաձև գեղձի ճիշտ աշխատանքի համար։
Ինչու է սա կարևոր. Սելենն անհրաժեշտ է, որպեսզի պակաս ակտիվ T4 հորմոնը վերածվի ակտիվ T3-ի։ Այն նաև պաշտպանում է գեղձի հյուսվածքները վնասներից՝ շնորհիվ իր հակաօքսիդանտ հատկությունների։
Ինչպես ուտել. Օրական ընդամենը 1-2 ընկույզ, և սելենի օրական նորմը ապահովված է։ Ավելին՝ պետք չէ։
Հնդկահավի կամ հավի կրծքամիս
Անյուղ սպիտակ միսը հարուստ է թիրոզինով՝ ամինաթթվով, որից օրգանիզմում սինթեզվում են վահանաձև գեղձի հորմոնները (յոդի հետ զուգակցված)։
Ինչու է սա կարևոր. Առանց թիրոզինի՝ հորմոնների արտադրությունը դանդաղում է։ Իսկ մսից ստացվող բարձրորակ սպիտակուցը նաև աջակցում է նյութափոխանակության գործընթացներին։
Ինչպես ուտել. Թռչնամիսը պատրաստեք շոգեխաշած, թխած կամ խաշած. շաբաթական 2-3 բաժինը լավ օգնություն կլինի։
Հնդկաձավար
Օգտակար է ոչ միայն անոթների համար, այլև նրանով, որ օրգանիզմին ապահովում է կայուն էներգիայով։
Ինչու է սա կարևոր. Հնդկաձավարը դանդաղ ածխաջրեր են, որոնք չեն առաջացնում շաքարի կտրուկ տատանումներ և օրգանիզմին երկար ժամանակով ապահովում են էներգիայով։ Իսկ հոգնածությունը «հոգնած» վահանաձև գեղձի ամենահաճախակի ուղեկիցներից մեկն է։
Ինչպես ուտել. Շիլան նախաճաշին կամ խավարտը ճաշին՝ իդեալական ընտրություն է։
Ձու
Էժան և մատչելի մթերք, որը միաժամանակ պարունակում է և՛ յոդ, և՛ սելեն, և՛ D վիտամին՝ վահանաձև գեղձի առողջության համար անհրաժեշտ բոլոր տարրերը։
Ինչու է սա կարևոր. D վիտամինը նույնպես կապված է վահանաձև գեղձի ֆունկցիայի հետ, իսկ դեղնուցները մի տեսակ բնական մուլտիվիտամին են։
Ինչպես ուտել. Շաբաթական 3-5 ձու՝ ձվածեղի կամ խաշած տեսքով՝ լիովին բավարար է սննդակարգի օգտակարության և բազմազանության համար։
Կարևոր լրացում
Զգուությամբ մոտեցեք խաչածաղկավորների ընտանիքի բանջարեղենի (բրոկկոլի, կաղամբ, բողկ) հում վիճակում օգտագործմանը։ Մեծ քանակությամբ դրանք կարող են նվազեցնել յոդի յուրացումը։ Սակայն ջերմային մշակումը (եփելը, շոգեխաշելը, թխելը) այս ազդեցությունը գրեթե զրոյի է հասցնում։ Լիովին հրաժարվել դրանցից չարժե, պարզապես պահպանեք չափավորություն։
Եզրակացություն
Վահանաձև գեղձի աշխատանքի խանգարումները դատավճիռ չեն, այլ օրգանիզմի կարևոր ազդանշան, որ ժամանակն է վերանայել կենսակերպը։ Հավասարակշռված սննդակարգը՝ բավարար քանակությամբ յոդով, սելենով, վիտամիններով և սպիտակուցով, հիանալի աջակցություն է մարմնի բոլոր գործընթացների «դիրիժորի» համար։ Սննդակարգում ընդամենը հինգ օգտակար մթերք ներառելով՝ դուք կօգնեք վահանաձև գեղձին ավելի ակտիվ աշխատել, իսկ ձեզ՝ զգալ աշխույժ և վստահ։
Կարևոր է հիշել.
Այս հոդվածը տեղեկատվական բնույթ է կրում և չի փոխարինում մասնագիտական բժշկական օգնությանը։ Եթե ունեք կասկածներ վահանաձև գեղձի աշխատանքի խանգարումների վերաբերյալ, անպայման խորհրդակցեք բժշկի հետ և հանձնեք անհրաժեշտ անալիզները։ Մի զբաղվեք ինքնաբուժությամբ։
