Մի՛ անտեսեք ձեր ձեռքի այս փոքրիկ կարմիր բծերը․ դրանք կարող են կարևոր նախազգուշացնող նշաններ լինել
Միացյալ Թագավորությունում արձանագրվում են քոսի անսովոր մեծ բռնկումներ, և բժիշկները հորդորում են մարդկանց դիմել բուժօգնության, եթե մարմնի վրա կարմիր կետեր նկատեն և ախտանիշներն անտես չանեն։
Քոսը քոր առաջացնող ցան է, որն առաջանում է տզերից և տարածվում մաշկի անմիջական շփման միջոցով։ Վաղ բուժումը կարևոր է տարածումը կանխելու համար։ Ցանկացած մարդ կարող է վարակվել դրանով։
Ընդհանուր ախտանշաններից են ուժեղ քորը, հատկապես գիշերը, և բարձրացած ցանը կամ բծերը։
Քոսն սովորաբար ցան է առաջացնում մարմնի վրա՝ բացառությամբ գլխի և պարանոցի, և հաճախ հայտնվում է մատների արանքում, դաստակների, թևատակերի, գոտկատեղի, աճուկի և հետույքի շուրջ։
Փոքր երեխաները, տարեցները և թուլացած իմունային համակարգ ունեցողներ կարող են քոս ունենալ գլխի, պարանոցի, ափերի և ներբանների վրա։ Իմունային անբավարարություն ունեցող անձանց մոտ քոսի խիստ վարակիչ տեսակը՝ կեղևային քոսը, կարող է թեփոտ ցան առաջացնել արմունկների, ծնկների, ձեռքերի և ոտքերի վրա։
Ազգային առողջապահական ծառայության (NHS) տվյալներով՝ երկրի հիվանդանոցներում ախտորոշված վարակված մարդկանց թիվը գերազանցում է 3600-ը։
Ըստ Ընդհանուր պրակտիկայի բժիշկների թագավորական քոլեջի (RCGP) նախագահ, պրոֆեսոր Քամիլա Հոթորնի՝ շատ մարդիկ, ովքեր ունեն ախտանշաններ, հրաժարվում են բժշկական օգնություն փնտրել վարակի շուրջ առկա «սոցիալական խարանի» պատճառով։ Նա նշեց, որ ընդհանուր պրակտիկայի բժիշկների ախտորոշումների թիվը «գերազանցում է հնգամյա միջինը և աճում է, ընդ որում՝ Անգլիայի հյուսիսում դեպքերի կտրուկ աճ է նկատվում»։
«Թեև լուրջ վիճակ չէ, քոսը կարող է շատ քոր առաջացնող և գրգռիչ լինել», – ասաց նա։
«Եթե ճիշտ չբուժվի, այն կարող է տարածվել և մեծացնել հիվանդի մոտ բարդությունների, ինչպիսիք են մաշկի երկրորդական վարակները կամ առկա մաշկային հիվանդությունների վատթարացման ռիսկը»։
Քոսի բռնկման պատճառներից մեկը, չնայած դրան կցված սոցիալական խարանին, բուժման պակասն է։
