Երբ որոշում ենք ավելի առողջ սնվել, հացը հաճախ առաջինն է, որ բացառվում է սննդակարգից։ Սակայն տարբեր հացահատիկներից ստացվող ածխաջրերը բոլորովին հավասար չեն։ Եվ եթե սպիտակ հացից հրաժարվելը կարող է օգնել մի քանի կիլոգրամ նիհարել, ապա ամբողջահատիկ ալյուրից պատրաստված հացը բացառելը իրականում զրկում է օրգանիզմը կարևոր սննդարար նյութերից։
Կարող է կոտրվել եղունգի թիթեղը
Ամբողջահատիկ հացը մագնեզիումի լավ աղբյուր է, որն անհրաժեշտ է սպիտակուցի սինթեզի և եղունգների առողջության համար։ Մագնեզիումի պակասը կարող է եղունգների վրա ուղղահայաց ակոսներ և դրանց փխրունություն առաջացնել։ Եթե հացի հետ մեկտեղ մագնեզիում չեք ստանում այլ մթերքներից, դա բացասաբար կանդրադառնա եղունգների ամրության վրա։
Կարող են հայտնվել ոտքերի ջղակծկումներ
Նիհարել ցանկացողները հաճախ փորձեր են անում ածխաջրերի նվազագույն սպառման հետ, սակայն հացից լիովին հրաժարվելը տհաճ կողմնակի ազդեցություններ ունի։ Խիստ կետո դիետայի դեպքում, որը բացառում է հացն ու այլ ածխաջրեր, դուք կարող եք տառապել ոտքերի գիշերային ջղակծկումներից՝ ցավոտ սպազմերից, որոնք տևում են մի քանի վայրկյանից մինչև մի քանի րոպե։ Հացը հարուստ է էլեկտրոլիտներով, և դրանց պակասի դեպքում առաջանում են ջղակծկումներ։
Կարող է առաջանալ քրոնիկ հոգնածություն
Թեև սպիտակ հացը ածխաջրերի ամենաառողջ աղբյուրը չէ, ամբողջահատիկ և ծլեցրած հացի չափավոր սպառումն օգնում է պահպանել էներգիան։ Երկաթի, բջջանյութի և մագնեզիումի պարունակության շնորհիվ այս մթերքները թույլ են տալիս ձեզ կուշտ և եռանդուն զգալ, նույնիսկ ծանր աշխատանքային օրվանից հետո մնում է մարզվելու ուժ։
Հնարավոր է քաշի ավելացում
Որոշ մարդիկ, հացը բացառելով, դրա բացակայությունը լրացնում են այլ կալորիական մթերքներով, և քաշի նվազեցման փոխարեն դիտվում է հակառակ ազդեցությունը։
Կուժեղանան «շաքարային» կախվածությունները
Հացը էներգիայի աղբյուր է ծառայում։ Եթե այն չեք ուտում, օրգանիզմն արագ «լիցքավորում» է փնտրում քաղցրավենիքի և գազավորված ըմպելիքների մեջ։ Հացի չափավոր սպառումը ավելորդ կիլոգրամների չի հանգեցնում, իսկ ահա ուժերի անկման դեպքում թխվածքաբլիթների և շոկոլադի հաճախակի ուտելը՝ հեշտությամբ։
Կարող են առաջանալ աթոռակի հետ կապված խնդիրներ
Եթե բացառում եք միայն սպիտակ հացը, հավանաբար տհաճ հետևանքներ չեք նկատի։ Իսկ ահա ամբողջահատիկ կամ տարեկանի հացից հրաժարվելը կարող է դժվարացնել աղիքների դատարկումը։ Ամբողջահատիկ հացը՝ բջջանյութի բարձր պարունակության շնորհիվ, երբեմն նույնիսկ ավելի լավ է աշխատում, քան լուծողականները։
Կարող են ուժեղանալ տրամադրության փոփոխությունները
Երբ տխուր ենք, ձգտում ենք պիցցայի կամ այլ ածխաջրային ուտեստների. դրանցում սկսվում է սերոտոնինի՝ «երջանկության հորմոնի» արտադրությունը, որը բարձրացնում է տրամադրությունը և ճնշում ախորժակը։ Օգտակար ածխաջրերից պարբերական հաճույք ստանալն իսկապես օգնում է ավելի լավ զգալ։
Կարող է սկսվել մազաթափություն
Ածխաջրերը օրգանիզմի, ներառյալ մազի ֆոլիկուլների, էներգիայի կարևոր աղբյուր են։ Ածխաջրերի չափազանց ցածր սպառման դեպքում (օրինակ՝ առանց հացի) մարմինը էներգիան խնայում է ավելի կարևոր գործառույթների համար, և մազերը կարող են սկսել թափվել։
Բարձրանում է սրտային հիվանդությունների ռիսկը
Սրտի առողջության համար կարևոր է, թե ինչ հացահատիկներ եք բացառում սննդակարգից։ Զտված ածխաջրերը մեծացնում են սրտի հիվանդությունների ռիսկը, իսկ ամբողջահատիկները՝ ընդհակառակը, օգնում են նվազեցնել խոլեստերինի մակարդակը և պաշտպանել սիրտը։
