Կենտրոնական Ռուսաստանում Վոլգա գետի հատակում հայտնաբերվել են մի երիտասարդ զույգի մարմիններ, ովքեր անհետացել էին մոտ մեկ տասնամյակ առաջ։ 2005 թվականի դեկտեմբերին 25-ամյա Իլյա Ժիրնովը և նրա 22-ամյա ընկերուհի Կիրա Չերկասովան անհետացել էին։ Նրանց ոսկորները հայտնաբերվել են Վոլգա գետի հատակում՝ Չուվաշիայի Հանրապետությունում գտնվող մի մեքենայի մեջ, այն բանից ավելի քան տասը տարի անց, երբ նրանք անհետացել էին Չեբոքսարի քաղաքից։
Իշխանություններին հաջողվել է զույգին նույնականացնել շնորհիվ մեքենայի փաստաթղթերի, որոնք պահպանվել էին ջրի տակ ավելի քան տասը տարի։ 2005 թվականի դեկտեմբերին, երբ պարոն Ժիրնովը հորից մեքենան վերցրել էր օրիորդ Չերկասովային աշխատանքից տուն տանելու համար, դա վերջին անգամն էր, երբ նրանց միասին տեսել էին։
Մինչ օրս ընտանիքները տեղյակ չէին երիտասարդ սիրահարների գտնվելու վայրի մասին։ Ոստիկանությունը զբաղվել էր անհետացած զույգի գործով, սակայն ի վերջո ստիպված էր եղել դադարեցնել այն՝ ապացույցների բացակայության պատճառով։
Մի տեղացի սուզորդ-էնտուզիաստ, ում անունը հրապարակված չէ, մոտակա լողափի մոտակայքում գետի ջրերը հետազոտելիս գտել է զույգի ավտոմեքենան։ Հաջորդ օրը նա ոստիկանությանը տեղեկացրել է իր հայտնագործության մասին, և նրանք կարողացել են մեքենան դուրս բերել գետից։ Իշխանությունները կարծում են, որ զույգը մահացել է գետի մոտակա սառցակալած ճանապարհին տեղի ունեցած դժբախտ պատահարի հետևանքով։ Շարունակվող ոստիկանական հետաքննության արդյունքները ի վերջո կհրապարակվեն։
