Երբ Վալարի Ուոթսը հուլիսին մեռելածին որդի ունեցավ, սիրտը կոտրվեց։ Դեռևս սգի մեջ՝ նա որոշեց բաժանվել իր գնած իրերի մեծ մասից, որոնք նախատեսված էին Նոյի՝ տուն վերադառնալու համար։
Սակայն նա չէր ցանկանում բաժանվել սպիտակ մանկական մահճակալից և որոշեց այն չներառել անցյալ ամիս կազմակերպած ավտոտնակային վաճառքի մեջ։ Սակայն, երբ թոշակառու Ջերալդ Քումպուլան տեսավ այն, խնդրեց իրեն վաճառել։
28-ամյա Ուոթսը երկմտում էր, բայց վերջապես զիջեց, երբ լսեց, որ 75-ամյա Ջերալդը արհեստավոր է, ով նստարաններ էր պատրաստում օգտագործված մահճակալների գլխամասերից ու ոտնամասերից։
«Ինձ մի փոքր ավելի հանգիստ զգացի, քանի որ նա լավ բան կանի», – ասաց Ուոթսը։ Նա այն վաճառեց 2 դոլարով։
Ուոթսը զրուցեց Ջերալդի կնոջ՝ Լորենի հետ, և նա կիսվեց իր սրտաճմլիկ պատմությամբ այն բանից հետո, երբ Լորենը վաճառքի ժամանակ տեսավ մանկական հագուստ և հարցրեց Ուոթսին, թե քանի տարեկան է իր որդին։
Տունդարձի ճանապարհին Լորենը Ուոթսի պատմությունը պատմեց Ջերալդին։ Քումպուլաները, ովքեր ունեն 15 երեխա և տասնյակ թոռներ, գիտեին, որ մահճակալը պետք է մնա Ուոթսի մոտ։ Մեկ շաբաթ անց զույգը Ուոթսին հասցրեց մահճակալից պատրաստված նստարանը։
TODAY.com-ին տված հարցազրույցում Ուոթսն ասել է. «Դա հիանալի է։ Ես մտածեցի. «Դեռ կան բարի մարդիկ»»։
Նա նստարանը դրեց իր հյուրասենյակում, որտեղ կարող է հիշել Նոյին։ «Ես ուրախությամբ լի եմ, որ այն պարզապես մի տեղ անօգտագործելի չի կանգնած», – ասաց նա։ – «Հիմա ես կարող եմ նստել դրա վրա, պահել նրա արջուկին, մտածել նրա մասին, եթե պետք լինի»։
Ուոթսն իր հղիության վերջին օրերին ավելի քիչ պտղի շարժեր էր զգում, և Նոյը ծնվեց հուլիսի 22-ին կեսարյան հատումով, ընդամենը մի քանի ժամ անց այն բանից հետո, երբ Ուոթսն ու փեսացու Ջիմի Համբլինը իմացան, որ սրտի բաբախյուն չկա։ Բժիշկների խոսքով՝ պորտալարը սեղմվել էր՝ Նոյին զրկելով թթվածնից։
Քումպուլաները, որոնց առաջին թոռնուհին մեռելածին էր ծնվել, Ուոթսի ցավն ավելի լավ էին հասկանում, քան շատերը։ «Անօգտագործելի մահճակալը տխուր հիշեցում է», – ասաց Ջերալդը։
– «Նստարանն ավելի շուտ հուշարձան է։
Դա այդ տխուր իրադարձության մի մասն է, բայց դա այնպիսի հիշեցում չէ, ինչպիսին կլիներ մահճակալը՝ դատարկ մահճակալը»։ Ուոթսն առաջարկեց նրան վճարել, բայց Ջերալդը հրաժարվեց։ «Պարզապես հաճելի է ինչ-որ բան անել ինչ-որ մեկի համար։
Հաճելի է օգնել մարդկանց», – ասաց նա։
Ուոթսն ունի 7-ամյա դուստր՝ Նևիան, և այս աշուն նա ամուսնանալու է Համբլինի հետ։ Նա հայտարարեց, որ նստարանը, որը կանգնած է անկյունային գրապահարանի կողքին, որտեղ պահվում են Նոյի լուսանկարները, նրա ձեռքերի, ոտքերի դրոշմները և աճյունը, օգնում է նրան հաղթահարել վիշտը։
«Ինչ-որ իմաստով, երբ ես նստում եմ դրա վրա, մխիթարություն եմ զգում նրա ներկայությունից, թեև նա այստեղ չէ», – ասաց Ուոթսը՝ դայակը։ – «Դա կարծես հանգիստ, ամեն ինչ կարգին զգացողություն է։ Երբ տխուր եմ, կարող եմ նստել նստարանին, և ես լավ եմ զգում, ամեն ինչ կարգին կլինի»։
