Ժամանակակից բժշկությունը երբեմն ունակ է իսկական հրաշքների։ Ի վերջո, դա այլ կերպ չես անվանի, քան հրաշք, որ հղիության 5-րդ ամսում ծնված փոքրիկ Հարփերն ու Հարրի Քրայմը կարողացան գոյատևել։
Երեխաների մայրը՝ Ջեյդը և նրա ամուսինը՝ Սթիվը, վաղուց էին փորձում ծնողներ դառնալ։ Զույգը 11 տարի բուժվել է անպտղության դեմ, նրանք ստիպված են եղել չծնված մի քանի երեխա կորցնել։
ԷԿՈ-ի հերթական պրոցեդուրայից հետո բժիշկները վերջապես ամուսիններին հայտնեցին լավ լուրը՝ զույգը սպասում էր միանգամից երկու երեխայի՝ տղայի և աղջկա։ Սակայն հղիության ընթացքում կրկին խնդիրներ առաջացան, արդյունքում` փոքրիկ եղբայրն ու քույրը ծնվեցին 22 շաբաթականում, մինչդեռ նորմալ հղիությունը տևում է մոտ 40 շաբաթ:
Երկվորյակները ստիպված էին մի քանի վիրահատությունների և բժշկական միջամտությունների ենթարկվել, փոքրիկները տառապել են սեպսիսով, տեսողության և շնչառական խնդիրներով։ Բայց բժիշկների ջանքերն ապարդյուն չանցան, մի քանի շաբաթ բուժումից հետո երեխաները կարողացան տուն գնալ ծնողների հետ, ըստ երևույթին ժամանակի ընթացքում նրանք լիովին կվերականգնվեն և ոչ մի կերպ հետ չեն մնա իրենց հասակակիցներից։
